Robot Dəstəkli Adenomioz Cərrahiyyəsi Nədir? Hansı Hallarda Aparılır?

Adenomioz adətən menopauzadan sonra öz-özünə aradan qalxır. Buna görə də müalicə üsulu pasiyentin həyatının hansı dövründə olması ilə sıx bağlıdır. Adenomioza bağlı ağrıları kəsmək üçün ağrıkəsici dərmanlar seçilə bilər. Xüsusilə aybaşı qanaxmasından bir-iki gün əvvəl qəbul edilməyə başlanan dərmanlar sayəsində həddindən artıq qanaxmanın və ağrının qarşısı alına bilir. Bundan başqa, estrogen – progestin tərkibli hamiləlikdən qorunma tabletləri kimi dərmanlarla və ya uşaqlıqdaxili vasitələrlə hormonal müalicə də aparıla bilər.

Lakin ağrının çox şiddətli olduğu və digər müalicə üsullarının nəticə vermədiyi hallarda cərrahi müdaxilə tələb olunur. Uşaqlığın müəyyən bir nahiyəsində olan adenomioz ocaqları laparoskopik və ya robot dəstəkli cərrahiyyə ilə çıxarıla bilər. Xüsusilə gənc yaşda olan və uşaq sahibi olmaq istəyən qadınlarda bu müalicə çox vacibdir. Digər cərrahi üsul isə histerektomiya əməliyyatı ilə uşaqlığın tamamilə çıxarılmasıdır. Bu müalicə üsulu gələcəkdə uşaq sahibi olmağı düşünməyən pasiyentlərə və adenomiozun bütün uşaqlığı əhatə etdiyi pasiyentlərə tövsiyə olunur.

Robot dəstəkli cərrahiyyə ilə adenomiozun çıxarılması çətin və təcrübəli cərrahlar tərəfindən həyata keçirilməli olan bir əməliyyatdır. Əməliyyatdan əvvəl pasiyent hərtərəfli qiymətləndirilməli və adenomioz sərhədi dəqiq müəyyən edilməlidir. Bəzən əməliyyat zamanı transvaginal ultrasonoqrafiyadan istifadə edilərək əməliyyatın daha uğurlu aparılması tələb oluna bilər. Robot qollarının insan əli ilə müqayisədə çox daha çox istiqamətdə hərəkət etmək qabiliyyətinə malik olması səbəbindən bu əməliyyatlar çox uğurla aparılır. Histerektomiya əməliyyatı da robot dəstəkli olaraq pasiyentin qarın nahiyəsində açılan 3-4 ədəd, 1 sm-dən kiçik kəsikdən həyata keçirilir.

Bu kəsiklərdən robot qolları və kamera qarın boşluğuna yerləşdirilir. Robot qolları sayəsində uşaqlıq bağlarından və qan damarlarından ayrılaraq tamamilə çıxarılır. Menopauza dövründə olan şəxslərdə isə uşaqlıq boruları və yumurtalıqlar da uşaqlıqla birlikdə çıxarılır. Robot dəstəkli cərrahiyyə ilə prosedur daha qısa çəkir və əməliyyat zamanı baş verən qan itkisi minimuma enir. Bundan əlavə, əməliyyatın kiçik kəsiklər vasitəsilə aparılması sayəsində sağalma dövrü də xeyli qısalır. Bunun sayəsində pasiyentlər normal həyatlarına çox daha tez qayıdırlar.